Apicius, De Re Coquinaria 8.372

Porcellum farsilem duobus generibus: curas, a gutture extenteras, ornas. antequam praedures, subaperies auriculam subcaute, mittes inpensam terentinam in vesicam bubulam, exin fistulam aviarii rostro vesicae alligabis, per quam exprimes in aurem quantum ceperit, postea carta praecludes et infiblabis et praeparabis aliam inpensam, sic facies: teres piper, ligisticum, origanum, lasaris radicem modicum, suffundes liquamen, adicies cerebella cocta, ova cruda, alicam coctam, ius de suo sibi, si fuerit aucellas, nucleos, piper integrum, liquamine temperas. inples porcellum, carta obducas et fiblas. mitte sis in furnum. cum coctus fuerit, exoneras, perunguis et inferes.