Cicero, De Divinatione 1.40

Num te ad fabulas revoco vel nostrorum vel Graecorum poëtarum? narrat enim et apud Ennium Vestalis illa: excita cum tremulis anus attulit artubu' lumen, talia tum memorat lacrimans exterrita somno: ' Eurydica prognata, pater quam noster amavit, vires vitaque corpu' meum nunc deserit omne. nam me visus homo pulcher per amoena salicta et ripas raptare locosque novos; ita sola postilla, germana soror, errare videbar tardaque vestigare et quaerere te neque posse corde capessere; semita nulla pedem stabilibat.