Plautus, Persa 4.5

Toxilvs Edepol dedisti, virgo, operam adlaudabilem, probam et sapientem et sobriam. Virgo Si quid bonis boni fit, esse id et grave et gratum solet. Toxilvs Audin tu, Persa? ubi argentum ab hoc acceperis, simulato, quasi eas prorsum in navem. Sagaristio Ne doce. Toxilvs Per angiportum rursum te ad me recipito illac per hortum. Sagaristio Quod futurum est praedicas. Toxilvs At ne cum argento protinam permittas domum, moneo, te. Sagaristio Quod te dignumst, me dignum esse vis? Toxilvs Tace, párce voci: praeda progreditur foras.