Plautus, Truculentus 2.6

Stratophanes Ne expectetis, spectatores, meas pugnas dum praedicem: manibus duella praedicare soleo, haud in sermonibus. scio ego multos memoravisse milites mendacium: et Homeronida et postilla mille memorari pote, qui et convicti et condemnati falsis de pugnis sient. non laudandust cui plus credit qui audit quam ille qui videt: pluris est oculatus testis unus quam auriti decem; qui audiunt audita dicunt, qui vident plane sciunt. non placet quem scurrae laudant, manipularis mussitant, neque illi quorum lingua gladiorum aciem praestringit domi. strenui nimio plus prosunt populo quam arguti et cati: facile sibi facunditatem virtus argutam invenit, sine virtute argutum civem mihi habeam pro praefica, quae alios conlaudat, eapse sese vero non potest. nunc ad amicam decimo mense post Athenas Atticas viso, quam gravidam hic reliqui meo compressu, quid ea agat. Phronesivm Vide quis loquitur tam propinque. Astaphivm Miles, mea Phronesium, tibi adest Stratophanes. nunc tibi opust, aegram ut te adsimules. Phronesivm Tace. cuí adhuc ego tam mala eram monetrix, me maleficio vinceres? Stratophanes Peperit mulier, ut ego opinor. Astaphivm Vin adeam ad hominem? Phronesivm Volo. Stratophanes Euge, Astaphium eccam it mi advorsum. Astaphivm Salve ecastor, Stratophanes. salvom te— Stratophanes Scio. sed peperitne, ópsecro, Phronesium? Astaphivm Peperit puerum nimium lepidum. Stratophanes Ehem, ecquid mei similest? Astaphivm Rogas? quin ubí natust machaeram et clupeum poscebat sibi? Stratophanes Meus est, scio iam de argumentis. Astaphivm Nimium tuí similest. Stratophanes Papae, iam magnust? iamne iit ad legionem? ecquae spolia rettulit? Astaphivm Heia, nudius quintus natus ille quidem est. Stratophanes Quid postea? inter tot dies quidem hercle iam aliquid actum oportuit. quid illi ex utero exitiost prius quam poterat ire in proelium? Astaphivm Consequere atque illam saluta et gratulare illi. Stratophanes Sequor. Phronesivm Vbi illa, óbsecro, est quae me hic reliquit, eapse abiit? ubist? Astaphivm Adsum, adduco tibi exoptatum Stratophanem. Phronesivm Vbi is est, obsecro? Stratophanes Mars peregre adveniens salutat Nerienem uxorem suam. quom tu recte provenisti quomque es aucta liberis, gratulor, quom mihi tibique magnum peperisti decus. Phronesivm Salve, qui me interfecisti paene vita et lumine quique mihi magni doloris per voluptatem tuam condidisti in corpus, quo nunc etiam morbo misera sum. Stratophanes Heia, haud ab re, mea voluptas, tibi istic obvenit labos: filium peperisti, qui aedis spoliis opplebit tuas. Phronesivm Multo ecastor magis oppletis tritici ópust granariis, ne, ille prius quam spolia capiat, hic nos extinxit fames. Stratophanes Habe bonum animum. Phronesivm Savium pete hinc sis. ah, nequeo caput tollere, ita dolet itaque ego † medulo, neque etiam queo pedibus mea sponte ambulare. Stratophanes Si hercle me ex medio mari savium petere tuom iubeas, petere hau pigeat , mel meum. id ita esse experta es: nunc experiere, mea Phronesium, me te amare. adduxi ancillas tibi eccas ex Suria duas, is te dono. adduce hoc tu istas. sed istae reginae domi suae fuerunt ambae, earum patriam ego excidi manu. his te dono. Phronesivm Paenitetne te quot ancillas alam, quin examen super adducas, quae mihi comedint cibum? Stratophanes Hoc quidem herclést ingratum donum. cedo tu mi istam purpuram. mea voluptas, attuli eccam pallulam ex Phrygia tibi. tene tibi. Phronesivm Hocine mi ob labores tantos tantillum dari? Stratophanes Perii hercle ego miser. iam mi auro contra constat filius: †etiam num mali pendit addit purpuram. ex Arabia tibi attuli tus, Ponto amomum. tene tibi, voluptas mea. Phronesivm Accipe hoc, Astaphium, abduce hasce hinc e conspectu Suras. Stratophanes Ecquid amas me? Phronesivm Nihil ecastor, neque meres. Stratophanes Nilne huic sat est? ne bonum verbum quidem unum dixit. viginti minis venire illaec posse credo dona quae ei dono dedi. vehementer nunc mi est irata, sentio atque intellego; verum abibo. quid ais? nunc tu num nevis mé, voluptas mea, quo vocatus sum ire ad cenam? mox huc cubitum venero. quid taces? planissume edepol perii. sed quid illuc novi est? quis hic homost, qui ducit pompam tantam? certumst quo ferant observare. huic credo fertur. verum iam scibo magis.