Pliny the Elder, Naturalis Historia 7.56.p2

Litteras semper arbitror Assyrias fuisse, sed alii apud Aegyptios a Mercurio, ut Gellius, alii apud Syros repertas volunt, utrique in Graeciam attulisse e Phoenice Cadmum sedecim numero, quibus Troiano bello Palameden adiecisse quattuor hac figura ζυφχ, totidem post eum Simoniden melicumψξωθ, quarum omnium vis in nostris recognoscitur . Aristoteles decem et octo priscas fuisse et duas ab Epicharmo additas χζ quam a Palamede mavult. Anticlides in Aegypto invenisse quendam nomine Menen tradit, XV annorum ante Phoronea, antiquissimum Graeciae regem, idque monumentis adprobare conatur. e diverso Epigenes apud Babylonios D???CCXX annorum observationes siderum coctilibus laterculis inscriptas docet, gravis auctor in primis ; qui minimum, Berosus et Critodemus, CCCCXC . ex quo apparet aeternus litterarum usus. in Latium eas attulerunt Pelasgi.