Pliny the Elder, Naturalis Historia 8.59

Iam quaedam animalia indigenis innoxia advenas interemunt , sicut serpentes parvi in Myrinthe , quos terra nasci proditur. item in Syria angues circa Euphratis maxime ripas dormientes Syros non attingunt aut, etiamsi calcati momordere, non sentiuntur malefici , aliis cuiuscumque gentis infesti, avide et cum cruciatu exanimantes, quam ob rem et Syri non necant eos. contra in Latmo Cariae monte Aristoteles tradit a scorpionibus hospites non laedi, indi- genas interemi. sed reliquorum quoque animalium [et praeterea terrestrium] dicemus genera.