Valerius Maximus, Facta et Dicta Memorabilia 2.6.11

Auara et feneratoria Gallorum philosophia, alacris et fortis Cimbrorum et Celtiberorum, qui in acie gaudio exultabant tamquam gloriose et feliciter uita excessuri, lamentabantur in morbo quasi turpiter et miserabiliter perituri. Celtiberi etiam nefas esse ducebant proelio superesse, cum is occidisset, pro cuius salute spiritum deuouerant. laudanda utrorumque animi praesentia, quod et patriae incolumitatem fortiter et fidem amicitiae constanter praestandam arbitrabantur.