Valerius Maximus, Facta et Dicta Memorabilia 7.6.3

In illa obsidione et fide cum trecenti Praenestini permanerent, euenit ut ex his quidam murem captum ducentis potius denariis uendere quam ipse leniendae famis gratia consumere mallet. sed, credo, deorum prouidentia et uenditori et emptori quem uterque merebatur exitum adtribuit: auaro enim fame consumpto manubiis sordium suarum frui non licuit, aequi animi uir ad salutarem inpensam faciendam care quidem, uerum necessarie conparato cibo uixit.