Cato, De agri cultura 98

Vestimenta ne tiniae tangant. amurcam decoquito ad dimidium, ea unguito fundum arcae et extrinsecus et pedes et angulos. ubi ea adaruerit, vestimenta condito. si ita feceris, tiniae non nocebunt. et item ligneam supellectilem omnem si ungues, non putescet, et cum ea terseris, splendidior fiet. item ahenea omnia unguito, sed prius extergeto bene. postea cum unxeris, cum uti voles, extergeto. splendidior erit, et aerugo non erit molesta.