Cistellaria

The words most alive here

When a word means simply "to give," and lives in every kind of book at once, where do you look to find its life?

• Lampadio 64
• Alcesimarchvs 61
• do 49
• Melaenis 47
• Phanostrata 46
• facio 45
• Selenivm 37
• nunc 31
• Gymnasivm 31
• quam 30
• dico 29
• amo 28

By how often they stand in this work, the commonest particles set aside. Each opens onto its own word.

Read from it

• Phanostrata Audire vocem visa sum ante aedis modo mei Lampadisci servi. Lampadio Non surda es, era: recte audivisti. Phanostrata Quid agis hic? Lampadio Quod gaudeas. Phanostrata Quid id est? Lampadio Hinc ex hisce aedibus paulo prius vidi exeuntem mulierem. Phanostrata Illam quae meam gnatam sustulerat? Lampadio Rem tenes. Phanostrata Quid postea? Lampadio Dico éi, quo pacto eam ab hippodromo viderim erilem nostram filiam sustollere. extimuit tum illa. Melaenis Iam horret corpus, cor salit. nam mihi ab hippodromo memini adferri parvolam puellam eamque me mihi supponere. Phanostrata Age perge, quaeso. ánimus audire expetit ut gesta res sit. Melaenis Vtinam audire non queas. Lampadio Pergo illam onerare dictis: “illaec ted anus fortunis ex secundis ad miseras vocat. nam illaec tibi nutrix est, ne matrem censeas. ego te reduco et revoco ad summas ditias, ubi tu locere in luculentam familiam, unde tíbi talenta magna viginti pater det dotis; non enim hic, ubi ex Tusco modo tute tibi indigne dotem quaeras corpore.” Phanostrata An, amabo, meretrix illa est quae illam sustulit? Lampadio Immo fuit; sed ut sit dé ea re, eloquar. iam perducebam illam ad me suadela mea: anus éi amplexa est genua, plorans, obsecrans, ne deserat se: eam suam esse filiam, seque eam peperisse sancte adiurabat mihi. istanc quam quaeris inquit “ego amicae meae dedi, quae éducaret eam pro filiola sua; et vivit” inquit. ubi ea est? inquam extempulo. Phanostrata Servate di med obsecro. Melaenis At me perditis. Phanostrata Quoi illam dedisset exquisisse oportuit. Lampadio Quaesivi, et dixit meretrici Melaenidi. Melaenis Meum elocutust nomen, interii oppido. Lampadio Vbi elocuta est, ego continuo interrogo; ubi habitat? inquam duc ac demonstra mihi. avecta est inquit peregre hinc habitatum. Melaenis Obsipat aculam. Lampadio Quo avecta est, eo sequemur. sicine agis núgas? periisti hercle, ni non hoc longe destiti instare, usque adeo donec se adiurat anus iam mihi monstrare. Phanostrata Át non missam oportuit. Lampadio Servatur. sed illaec se quandam aibat mulierem suam bene volentem convenire etiam prius, commune quacum id esset sibi negotium. et scio venturam. Melaenis Me indicabit, et suas ad meas miserias † alias faciem consciam. Phanostrata Quid nunc vis facere me? Lampadio Intro abi atque animo bono es. vir tuos si veniet, iube domi opperirier, ne in quaestione mihi sit, si quid eum velim. ego ad ánum recurro rursum. Phanostrata Lampadio, obsecro, cura. Lampadio Perfectum ego hoc dabo negotium. Phanostrata Deos téque spero.— Lampadio Eosdem ego, uti abeas domum. Melaenis Adulescens, asta atque audi. Lampadio Men, mulier, vocas? Melaenis Te. Lampadio Quid negoti est? nam occupatus sum ampliter. Melaenis Quis istic habitat? Lampadio Demipho dominus meus. Melaenis Nempe istic est, qui Alcesimarcho filiam suam despondit in divitias maxumas? Lampadio Is ipsust. Melaenis Eho tu, quam vos igitur filiam nunc quaeritatis alteram? Lampadio Ego dicam tibi: non ex uxore natam uxoris filiam. Melaenis Quid istuc est verbi? Lampadio Ex priore muliere nata, inquam, meo ero est filia. Melaenis Certe modo huius, quaé locuta est, quaerere aibas filiam. Lampadio Huius ergo quaero. Melaenis Quo modo igitur, obsecro, haec est prior, quae nupta nunc est? Lampadio Conteris tu tua me oratione, mulier, quisquis es. medioxumam quam duxit uxorem, ex ea nata est haec virgo, Alcesimarcho quae datur. ea uxór diem obiit. iam scis? Melaenis Teneo istuc satis. sed ego illud quaero confragosum, quo modo prior pósterior sit et posterior sit prior? Lampadio Prius hanc compressit quam uxorem duxit domum, prius grávida facta est priusque peperit filiam; eam póstquam peperit, iussit parvam proici: ego eam proieci, ália mulier sustulit, ego inspectavi. érus hanc duxit postibi. eam núnc puellam filiam eius quaerimus. quid nunc supina susum in caelum conspicis? Melaenis Ei nunciam istuc quo properabas, nil moror. nunc intellexi. Lampadio Dis hercle habeo gratiam, nam ni intellexes, numquam, credo, amitteres.— Melaenis Nunc mihi bonae necessumst esse ingratiis, quamquam esse nolo. rem palam esse intellego: nunc egomet potius hanc inibo gratiam ab illis, quam illaec me indicet. ibo domum, atque ad parentes redducam Selenium.—

  Plautus, Cistellaria 2.3

• Demipho Quíd hoc negoti est, quód omnes homines fabulantur per vias mihi esse filiam inventam? et Lampadionem me in foro quaesivisse aiunt. Lampadio Ere, unde is? Demipho Ex senatu. Lampadio Gaudeo tibi mea opera liberorum esse amplius. Demipho Enim non placet. nil moror aliena mi opera fieri pluris liberos. sed quid istúc est? Lampadio Propera ire intro húc ad adfinem tuom, filiam tuam iám cognosces intus. íbidem uxor tua est. abi cito. Demipho Praevorti hoc certumst rebus aliis omnibus.— Caterva Ne exspectetis, spectatores, dum illi huc ad vos exeant: nemo exibit, omnes intus conficient negotium. ubi id erit factum, ornamenta ponent; postidea loci qui deliquit vapulabit, qui non deliquit bibet. nunc quod ad vos, spectatores, relicuom relinquitur, more maiorum date plausum postrema in comoedia.

  Plautus, Cistellaria 5.1

• Melaenis Rem élocuta sum tibi omnem; sequere hac me, Selenium, ut eorum quoiam esse oportet te sis potius quam mea. quamquam invita te carebo, ánimum ego inducam tamen ut illud quem ad modum tuam in rem bene conducat consulam. nam hic crepundia insunt, quibuscum te illa olim ad me detulit, quae mihí dedit, parentes te ut cognoscant facilius. accipe hanc cistellam, Halisca. ágedum pulta illas fores. dic me orare ut aliquis intus prodeat propere ocius. Alcesimarchvs Recipe me ad te, Mors, amicum et benevolum. Selenivm Mater mea, periimus miseraé. Alcesimarchvs Vtrum hac me feriam an ab laeva latus? Melaenis Quid tibi est? Selenivm Alcesimarchum non vides? ferrum tenet. Alcesimarchvs Ecquid agis? remorare. lumen linque. Selenivm Amabo, accurrite, ne se interemat. Alcesimarchvs O Salute méa salus salubrior, tu nunc, si ego volo seu nolo, sola me ut vivam facis. Melaenis Haud voluisti istuc severum facere. Alcesimarchvs Nil mecum tibi, mortuos tibi sum: hanc ut habeo certum est non amittere; nam hercle iam ad me adglutinandam totam decretum est dare. ubi estis, servi? occludite aedis pessulis, repagulis ilico: hanc ego tetulero intra limen.— Melaenis Abiit, abstulit mulierem. ibo, persequar iam illum intro, ut haec ex me sciat éadem, si possum tranquillum facere ex irato mihi.

  Plautus, Cistellaria 3.1

• Avxilivm Vtrumque haec, et multiloqua et multibiba, est anus. satin víx reliquit deo quod loqueretur loci, itá properavit de puellae proloqui suppositione. quod si tacuisset, tamen ego eram dicturus, deus, qui poteram planius. nam mihi Auxilio est nomen. nunc operam date, ut ego argumentum hoc vobis plane perputem. fuere Sicyoni iam diu Dionysia. mercator venit huc ad ludos Lemnius, isque hic compressit virginem, adulescentulus, vi, vinulentus multa nocte in via. is ubi malam rem scit se meruisse, ilico pedibus perfugium peperit, in Lemnum aufugit, ubi habitabat tum. ílla quam compresserat decumo post mense exacto hic peperit filiam. quoniam reum eius facti nescit qui siet, paternum servom sui participat consili, dat eam puellam ei servo exponendam ad necem. is eam proiecit. haec puellam sustulit. ille clam óbservavit servos qui eam proiecerat quo aut quas in aedis haec puellam deferat. ut eampse vos audistis confiterier, dat eam puellam meretrici Melaenidi, eaque educavit eam sibi pro filia bene ac pudice. tum illic autem Lemnius propinquam uxorem duxit, cognatam suam. ea diem suom obiit, facta morigera est viro. postquam ille uxori iusta fecit, ilico huc commigravit; duxit uxorem hic sibi eandem quam olim virginem hic compresserat, et eam cognoscit esse, quam compresserat; illa illi dicit, eius se ex iniuria peperisse gnatam átque eam se servo ilico dedisse exponendam. ille extemplo servolum iubet illum eundem persequi, si qua queat reperire quae sustulerit. ei rei nunc suam operam usque assiduo servos dat, si possiet meretricem illam invenire, quam olim tollere, cum ipse exponebat, ex insidiis viderat. nunc quod relicuom restat volo persolvere, ut expungatur nomen, ne quid debeam. adulescens hic est Sicyoni, ei vivit pater; is amore proiecticiam illam deperit quae dudum flens hinc abiit ad matrem suam, et illa hunc contra, qui est amor suavissimus. ut sunt humana, nihil est perpetuom datum. pater adulescenti dare volt uxorem; hoc ubi mater rescivit, iussit accersi eam domum. haec sic res gesta est. bene valete et vincite virtute vera, quod fecistis antidhac; servate vostros socios, veteres et novos, augete auxilia vostra iustis legibus, perdite perduelles, parite laudem et lauream, ut vobis victi Poeni poenas sufferant.—

  Plautus, Cistellaria 1.3

• Lena Idem míhi magnae quod parti est vitium mulierum quae hunc quaestum facimus: quae ubi saburratae sumus, largiloquae extemplo sumus, plus loquimur quam sat est. nam ego illanc olim, quae hinc flens abiit, parvolam puellám proiectam ex angiportu sustuli. eam meae ego amicae dono huic meretrici dedi, quae saepe mecum mentionem fecerat, puerum aut puellam alicunde ut reperirem sibi, recens natum, eapse quod sibi supponeret. ubi mihi potestas primum evenit, ilico feci eius ei quod me oravit copiam. postquam eam puellam á me accepit, ilico eandem puellam peperit quam a me acceperat, sine obstetricis opera et sine doloribus, item ut aliae pariunt, quae malum quaerunt sibi. nam amatorem aibat esse peregrinum sibi suppositionemque eius facere gratia. id duae nos solae scimus: ego quae illi dedi et illa quae a me accepit, praeter vos quidem. haec sic res gesta est. si quid usus venerit, meminisse ego hanc rem vos volo. ego abeo domum.—

  Plautus, Cistellaria 1.2

• Halisca Nisi quíd mi opis di dant, dísperii, neque unde aúxilium expetam hábeo. itaque † petulantia mea me animi miseram habet. quae in térgum meúm ne veniánt, male formído, si era méa me sciát tam socórdem esse quám sum. quamne ín manibus ténui atque accépi hic ante aédis cistéllam, ubi ea sít nesció, nisi ut opínor loca haec circiter excidit mihi. mei hómines, mei spectátores, facite índicium, si quís vidit, quis eam ábstulerit quisve sústulerit et utrum hác an illac iter ínstiterit. non súm scitiór, quae hos rogem aút quae fatígem, qui sémper maló muliebrí sunt lubéntes. nunc véstigia híc si qua súnt noscitábo. nam sí nemo hac praéter iít, postquam intro ábii, cistélla hic iacéret. quid híc? perii, opínor. actum ést, ilicét me infelícem et sceléstam. nulla ést, neque ego sum úsquam. perdíta perdidít me. sed pérgam ut coépi tamén, quaeritábo. nam et intús paveo et foris fórmido, ita núnc utrubique metús me agitat. ita súnt homines miseré miseri: ílle nunc laétus est, quísquis est, qui íllam habet, quaé neque illa ílli quicquam úsui et mi exítio est. sed mémet morór, quom hoc agó setius. Halísca, hoc age, ad térram aspice ét despice, oculís investíges, astúte augura. Lampadio Era. Phanostrata Hém quid est? Lampadio Haec ést. Phanostrata Quis est? Lampadio Quoi haec éxcidit cistélla. Phanostrata Certe est, eum locum signat, ubí ea excidit: apparet. Halisca Sed is hác iit, hac soccí video vestígium in pulvere, pérsequar hac. in hoc iám loco cum altero cónstitit. hic meis túrba oculis modo se óbiecit: neque prórsum iit hac: hic stétit, hinc illo exiít. hic conciliúm fuit. ad duós attinet, liquidúmst. attat, singulúm video vestígium. sed is hác abiit. contémplabor. hinc húc iit, hinc nusquam ábiit. actám rem ago. quod periít, periit: meum córium cum cistélla. redeo íntro. Phanostrata Muliér, mane. sunt quí volunt té conventam. Halisca Quis mé revocat? Lampadio Bona femina et malus masculus volunt te. Halisca postremo ille plus qui vocat scit quod velit, quam ego quae vocor. revortor. cistellam cum crepundiis, quam ego hic amisi misera? nam dudum ut accucurrimus ad Alcésimarchum, ne se vita interemeret, tum éam mihi opinor excidisse. Lampadio Cistellam haec mulier perdidit. taceamus, era, parumper. Halisca Disperii misera. quid ego erae dicam? quae me opere tanto servare iussit, qui suos Selenium parentes facilius posset noscere, quae erae supposita est parva, quam quaedam meretríx ei dedit. Lampadio Nostram haec rem fabulatur, hanc scire oportet, filia tua ubí sit, signa ut dicit. Halisca Nunc eam volt suae matri et patri, quibus nata est, reddere ultro. mi homo, obsecro, alias res geris, ego tibi meas res mando. Lampadio Istuc ago, atque istic mihi cibus est, quod fabulare, sed inter rém agendam istam erae huic respondi quod rogabat. quid quaeritabas? Halisca Mí homo et mea mulier, vos saluto. Phanostrata Et nos te. sed quid quaeritas? Halisca Vestigium hic requiro, qua aufugit quaedam aestio Lampadio Quid id? quid nam est? Halisca Alienum et maerorem familiarem. Lampadio Mala mers, era, haec et callida est. Phanostrata Ecastor ita videtur. Lampadio Imitatur nequam bestiam et damnificam. Phanostrata Quamnam, amabo? Lampadio Involvolum, quae in pampini folio intorta implicat se: itidem haec exorditur sibi intortam orationem. quid quaeritas? Halisca Cistellula hinc mi, adulescens, evolavit. Lampadio In caveam latam oportuit. Halisca Non edepol praeda magna. Lampadio Mirum quin grex venalium in cistella infuerit una. Phanostrata Sine dicat. Lampadio Si dicat quidem. Phanostrata Age lóquere quid ibi infuerit. Halisca Crepundia una. Lampadio Est quidam homo, qui illam ait se scire ubi sit. at pol ille a quadam muliere, si eam monstret, gratiam ineat. Lampadio At sibi ille quidam volt dari mercedem. Halisca At pol illa quaedam, quae illam cistellam perdidit, quoidam negat esse quod det. Lampadio At enim ille quidam operam bonam magis expetit quam argentum. Halisca At pol illi quoidam mulieri nulla opera gratuita est. Phanostrata Commodule quaedam. tu tibi nunc prodes. confitemur cistellam habere. Halisca At vos Salus servassit. ubi ea nunc est? Phanostrata Salvam eccam. sed ego rem meam magnam confabulari tecum volo: sóciam te mihi adopto ad meam salutem. Halisca Quid istúc negoti est? aut quis es? Phanostrata Egó sum illius mater, quae haec gestitavit. Halisca Hicine tu ergo habitas? Phanostrata Hariolare. sed quaéso, ambages, mulier, mitte atque hoc age. eloquere, unde haec sunt tibi, cito, crepundia. Halisca Mea haec erilis gestitavit filia. Lampadio Mentiris, nam mea gestitavit, non tua. Phanostrata Ne obloquere. Lampadio Taceo. Phanostrata Mulier, perge dicere. ubi ea est, quae gestitavit? Halisca Hic in proximo. Phanostrata Istic quidem edepol mei virí habitat gener. Phanostrata Ne obloquere rusus. perge porro dicere. quot annos nata dicitur? Halisca Septemdecim. Phanostrata Mea est. Lampadio East: u numerus annorum attulit. Halisca Quid qua tibi causa haec dixi? iam quaero meam. Lampadio At pol ego sunt, quaero tertiam. Phanostrata Quod quaeritabam, filiam inveni meam. Halisca Aequom est reponi per fidem quod creditum est, ne bene merenti sit malo benignitas. nostra haec alumna est, tua profecto filia: et redditura est tuam tibi, et ea gratia domo profecta est. ceterum ex ipsa, obsecro, exquaeritote: ego serva sum. Phanostrata Aequom postulas. Halisca Illius égo istanc esse malo gratiam. sed istánc cistellam te opsecro ut reddas mihi. Phanostrata Quid fit, Lampadio? Lampadio Quod tuom est teneas tuom. Phanostrata At me huius miseret. Lampadio Sic faciundum censeo: da isti cistellam et intro abi cum istac semul. Phanostrata Tibi auscultabo. tene tu cistellam tibi, abeamus intro. sed quid est nomen tuae dominae? Halisca Melaenis. Phanostrata I prae, iám ego te sequar.—

  Plautus, Cistellaria 4.2

Doors

• Ask about the words of the Cistellaria →
• Other works of Plautus Amphitruo ·Asinaria ·Aulularia ·Bacchides ·Captivi ·Casina ·Curculio ·Epidicus ·Menaechmi ·Mercator ·Miles Gloriosus ·Mostellaria ·Persa ·Poenulus ·Pseudolus ·Rudens